top of page

【獨菇遊】Day 4 準備北上蒙古國+買長途巴士飛論盡事|北京🇨🇳


無支付寶無微信,喺大陸生活真係有啲攰。

首先無得玩個共享單車,我每次出地鐵站 (可能因為唔係旺區),都要行至少15分鐘嘅路至到我目的地,而周圍都有十幾架共享單車等緊人坐,個刻就會好恨踩。

而今日我就浪費咗好多腳骨力......

其實今次去北京唔係旅行 (之前去過一次,仲意外發現長城 sir 滑梯落山方法竟然好好玩),係為買車飛而嚟。為咗北上蒙古國,決定預先去買長途巴士飛,先去中國蒙古邊境——扎門烏徳。


呢個方法比較少人提及,因為係最近至有人咁去。有時旅程嘅嘢真係好多變數,首先搵到2017年嘅資訊講嘅北京木樨園長途汽車站,問 hostel 嘅人至知原來已經摺咗,轉咗另一個地方叫新發地客運站,要花一小時去.....臨去買之前再問多次 reception 係咪肯定有飛,佢話有,而我有嘅係時間,就決定預先買好了。




靠 google map,我行咗一間好大嘅醫院出面,有保安守住,已經奇怪唔通要穿過醫院至可以到客運站?啲保安話要證件至入得去,有一位好人啲嘅保安肯幫我查,至知個客運站離我有啲遠,勸我搭巴士,即係話我 google 嘅位置係錯的...(又係嘅,自己地方當然國產 map (百度) 準啲...) 搭完巴士,原來都仲要行十幾二十分鐘至搵到客運站,但故事未完啊,因為排完隊買飛,賣飛女人同我講......



👩🏻- 賣飛女人 🌿- 我

👩🏻: 嗰日無飛啦。

🌿: 咁之後嗰日呢?

👩🏻: 都無啦

🌿: 吓?賣晒啦?!咁幾時有飛?

👩🏻: 要即日買啦~

🌿: 即係走個日至買得😨(内心好多個無奈)


原來係無得預先買飛㗎!!係要即日買......成個過程,因為搵錯地方,搞咗三個鐘 (未計返去個程)......兼白行一趟。


諗住搭巴士返去最近嘅地鐵,過咗站兩次,搭咗三次至落啱車...見識到無論巴士站幾荒蕪,隔離都有我無得用嘅共享單車。。。

(決定走個日直接搭的士算......)


0 則留言

留言


bottom of page