話説 Day 7 我揀咗搭巴士直接去蒙古邊境城市——扎門烏徳。而通常啲人係去到中國邊境——二連浩特，再自己搵吉普車過蒙古邊境，為咗方便同時間好就啲，所以我揀咗搭長途巴士過蒙古邊境，但難捱嘅等待亦正式開始。
以為搭 15 個鐘就到，點知到中國邊境，竟然要再等 5 小時至開車過境，終於等到開車，又遇上蒙古邊境發生咗啲事 (總之見到有堆人同傳媒喺度，由於語言不同，問唔到咩事)，然後又再等 1-2 個鐘。比預計到達時間係遲咗好多，所以都幾擔心買唔到去首都——烏蘭巴托 (UB) 嘅火車飛🤦🏻♀️
喺等待 5 小時開車入面，我仲以為自己唔見電話了！擾讓咗一小時，差啲誤會當地人，亦麻煩到 Jo。最後用Find My Phone，發現原來喺我背囊深深處=.= 當中我曾思考自己係咪未真正開始便要中斷旅程，畢竟好多嘢都靠電話處理。好彩虛驚一場！
Day 7 提到掛住女友嘅外國人 Jo（化名），我同佢成為咗去 UB 嘅 teammate (全車得我同佢聽唔明蒙古話)。計數好嘅佢，亦諗好大家要點唱錢，同等陣點做，務求最有效率地趕上即將開嘅火車（愛女友嘅力量很偉大😂）。
聽講火車 6pm 開，我哋 5pm 到，Jo係用跑嘅方式去幾十米距離既火車站買飛。田婆婆自問體質弱，經歷完睡眠不足同漫長等待，兼揹住十幾公斤重嘅 backpack，跑幾米個心臟已經頂唔順，而我同 Jo 嘅買飛錢喺晒我度......
🧔🏽- 外國人 Jo 🌿- 我
🌿(拎住銀包，對住離我十幾米遠嘅 Jo 講) : 你拎埋...啲錢.....去買飛...先啦......💦(想成個銀包擲俾佢)
🧔🏽: No~~~我想你都喺度！
🌿:💦💦💦(已經無氣講，心諗呢啲場面咁似團體比賽，要一齊努力完成，又振奮人心嘅場面，但我想抖吓😭)
終於成功買咗飛，但竟然又係要等。以為6pm開車，係完全語言同文字不通狀況下（火車女職員完全唔識英文），發現架車要 10pm 至開 ！！但因為咁又遇上英文好嘅蒙古夏雨爸爸。
就係咁，我＋Jo＋蒙古夏雨爸爸，一齊望住夕陽彩霞咁等火車開。
夏雨爸爸買咗幾枝 volka（蒙古人同俄羅斯人都好興飲 volka），邀請我哋飲。我因為易酒精敏感唔飲得，佢兩個舉杯暢飲，我就喺側邊寫生，忽然覺得，雖然今日好攰好漫長，但依家呢一刻卻覺得好寫意，其實都唔差呀：）